எஸ்.ஏ.சரவணக்குமார்

உனக்கு நீயே பரிசாய் ....!

2012-02-10T01:50:00.002+05:30

பணத்தை துரத்தும்

போராட்டத்தில்

தொலைந்து போன வாழ்கை,

திருவிழாவில் தொலைந்துபோன

குழந்தையை போல்

எங்கோ உட்கார்ந்து

அழுது கொண்டுத்தான் இருக்கிறது ....!

அம்மா முதியோர் இல்லத்தில் ...

மகள் குழந்தைகள் காப்பகத்தில் ....

மனைவி எட்டு பத்து பஸ்ஸில் ....

ஒன்பது மணி பஸ்சை

பிடிக்கும் அவசரத்தில் கணவன் ....

- தொலைந்து போன வாழ்வின்

மிச்சங்கள் ....!

மனைவியுடன் துய்க்க ...

குழந்தையுடன் விளையாட ...

அம்மாவுடன் பேச ....

வயிற்றுக்காய் வாரத்தில்

ஆறு நாட்களை தின்று

எழாவது நாளுக்காய்

கலைத்து காத்திருக்கும்

நீர்த்து போன வாழ்கை ...!

தின்று, கழித்து

கடத்தி வந்த நாட்களில்

வாழ்ந்த நாட்கள் எத்தனை ...?

தின்பதும், கழிப்பதும்

வாழ்கை எனில்

மிருகமாய், பறவையாய்,

புழுவாய் பிறந்திருக்கலாமே ....?

தேடி, தேடி சேர்த்து வைத்த

சொத்துக்களுக்காக

இழந்த சொந்தங்கள் எத்தனை ...?

சுவிசில் மில்லியனிலும்

பில்லியனிலும்

பணம் இருந்தாலும்

மக்கி மண்ணாய்த்தான்

போயாக வேண்டும் ....!

மண்ணாசையில் இடுகாட்டை கூட

அபகரித்ததால் தகனம்

மின்சார மேடையில்

கட்டாயமானது ...

வாழ்க்கை ஒரு கைப்பிடியில்

சுருங்கி போனது ....!

ஆறடி நிலம் கூட

உறுதியில்லாத வாழ்வில்

வீண் முக மூடிகள் எதற்காக ...?

பொய் முகத்தை கிழித்தெறிந்து

சுயத்தோடு வாழ்வோம் ...!

மனிதனுக்கு மனிதநேயத்தோடு

வேண்டும் போது தோழனாய் ...

தாய்க்கு தள்ளாத முதுமையில்

தாயாய் ...

மனைவிக்கு தோல்வியில் தோளாய் ...

அழும் கண்களுக்கு

கண்ணிற் துடைக்கும் கரங்களாய் ...

நண்பா...!

பணம் மட்டுமே குறிக்கோளான

வியாபார வாழ்க்கை,

உனக்கு கரண்சிகளை தரலாம் ...

ஆனால்,

வாழ்க்கையை தராது ...!

சந்தோசத்தில் பெரிய சந்தோசமே

சமூகத்தில் உடன் வாழ்வோரையும்

சந்தோசமாய் வைத்திருப்பது தான் .....

அந்த சந்தோசத்தை

உனக்கு

நீ

பரிசளிப்பாயா ....?

தினமலர் வாரமலரில் ஒரு இந்தியனின் மன்னிப்புக் கடிதம்!

2012-01-30T19:49:00.000+05:30

நன்றி தினமலர் வாரமலர் 30/01/2012

ஒரு இந்தியனின் மன்னிப்புக் கடிதம்!

அகிம்சையை போதித்தவனுக்கு,
நெஞ்சில் துப்பாக்கி ரவையை
பதக்கமாய் அணிவித்து,
ஓட்டுப் போட பணம்
பெற்றுக் கொள்கிறோம்!

'ஜாதிகள் இல்லையடி பாப்பா'
என்றவனின் நினைவு நாளில்,
அவனின் புகைப்படத்திற்கு
மாலை அணிவித்த கையோடு
ஜாதிவாரி கணக்கெடுப்பிற்கு
உடன்படுகிறோம்!

செக்கிழுத்து பெற்ற
சுதந்திரத்தை
டாஸ்மாக்கில் தேடுகிறோம்!

வெள்ளையன்,
"அவுட் ஆப் பேஷனாய்' போனதால்,
ஏமாற்றுக்காரர்களின் வெள்ளை உடை
பேஷன் ஆனது!

அடிமைத் தனத்தையும்,
சுகமான சுமையாகவே
அனுபவிக்க கற்றுக் கொண்டோம்!

எங்கள் உரிமையை
நாங்கள் விட்டுக் கொடுப்பதும் இல்லை...
பணமாகவோ, மூக்குத்தியாகவோ
கொடுத்தால் மட்டுமே ஓட்டு!

மகாத்மாவே...
பாரதியே...
தயவு செய்து மீண்டும்
வந்து விடாதீர்கள்!

எங்களுக்காக நீங்கள்
சிந்தும் ரத்தத்தை கூட,
"என்ன குரூப்' என வகை பிரித்து
காசாக்கி விடுவோம்!

கோவணம் போதும் என்றால்
மேலாடை எதற்கு என்று
உருவி விடுவோம்!

உங்களிடம்,
எங்களை மன்னிக்கும்படி
கேட்க எங்களுக்கு தகுதியில்லை!

எங்களை திருத்த
இனி நீங்கள்
கைத்தடியை தூக்கிப்பிடித்து
வந்தால் மட்டும் தான்
முடியும்...
வருவீர்களா?

உன் வார்த்தையை வாழவைக்கவேணும் ….

2011-11-30T01:05:00.000+05:30

காத்திருக்கிறேன் …….

புற அழகில் கவர்ந்த கண்கள்

அக மனதில் இணையும் போது

காதல் பிறக்கிறது ….!

புற அழகிலேயே நின்றுவிட்டவை

காமம் ….!

காதலுக்கும்

காமத்திற்கும்

நூலிடை வித்தியாசம் தான்,

உடல் மேல் போர்த்திய

ஆடையைப்போல் …

மெல்லிய உணர்வு ….!

விடியலில் படுக்கையை விட்டு

எழும் முன்

கடைசி ஐந்து நிமிட

தூக்கத்தைப்போல் சுகமானது

காதல் …..!

இதயம் பாறையாய்

தவம் கிடக்கும்

தன்னை சிலையாய்

செதுக்கப்போகும்

உளிக்காக ….

இதயம்

தாய்மை அடைந்து தவிக்கும் …!

காதல் …

கண்களற்ற,

காதுகளற்ற,

மூலையற்ற

ஜுவன் ….!

ஒத்த உணர்வுகள்

தனி உலகில் புணர,

விதவனைப்போல்

தனிமைப்படுத்தி வைத்திருக்கும்

இன்ப அவஸ்த்தை

காதல் …!

நான்

நீ

என்று யாரோவாக இருந்த நாம்

நான், நீயாகவும்

நீ, நானாகவும்

வளர்சிதை மாற்றத்தால்

“நாம்” ஆக்கிவைக்கும் காதல் ….

ஒரு மொட்டில்

ஒரு மலர் தான் …

அது காதலுக்கும் பொருந்தும் …!

என்று …

காதலை,

காதலுடன்

சொல்லிக் கொடுத்தவளே ….!

நீயும்

நானும்

நாமாக போகும்

வளர்சிதை மாற்றத்திற்காய்

காத்திருக்கிறேன் …

காதலில் காத்திருத்தல்

மட்டுமே பல நூற்றாண்டுகலாய்

காதலை சாகாமல்

வைத்திருக்கிறது என்றாய் ….

காத்திருப்பேன் …

உன் வார்த்தையை

வாழவைக்கவேணும் ….

உனக்காக ….

பயணத்திற்கு உதவாத மாய கப்பல் ……….!

2011-10-11T18:19:00.003+05:30

பயணத்திற்கு உதவாத மாய கப்பல் ……….!

கனவுப் போலத்தான்

வாழ்க்கை ……!

கனவு விடிந்தால்

கரைந்து போகும் ….

வாழ்க்கை கனவு

கலைந்து எழுந்தால்

உடன் நடித்த ஒரு

கதாபாத்திரம் காணாமல்

பேயிருக்கும் ………!

பணம், பதவி, மரியாதையெல்லாம்

நாம் உண்ணும் உணவைப்போல்,

ருசிக்க , ருசிக்க பசிக்கும்

ஆனால்,

நிரந்தரமின்றி வீணாய்ப்போகும் ……..!

ஆயிரம் பேர் சூழ்ந்திருக்க

நான் யார் தெரியுமா?

என்று கேட்கும் ஆணவம்

அதே கேள்வியை

தனிமையில் தன்னை நோக்கி

கேட்க ’நான்’

காணாமல் போயிருக்கும் …..!

காலுக்கு கீழ் அடிமையைப்போல்

கிடக்கும் பூமி,

-நிரந்தரமானது ……!

நானே எஜமான் என

மார்தட்டி திரிந்தவன்

மக்கி, மண்ணாய் அதே

பூமியோடு ஜக்கியமாவது

வாழ்வியல் சூத்திரம் …..!

உன்னை

எரிக்கலாம்,

அல்லது,

புதைக்கலாம் ……….

இதுவரை நீ சேர்த்து வைத்த

சொத்துக்கள் ……

சொந்தங்கள் ….

பதவிகள் …..

அதிகாரங்கள் ….

தம்பட்டங்கள் ….

அடுத்தவர்களின் வயிற்றெரிச்சல் …

ஆசிர்வாதங்கள் ….

ஏதேனும் துணைவருமா …. ?

தீ சுடும் …!

வாழ்ந்தோர் சொல்கேட்டும்

தெளியலாம் …

தொட்டுப்பார்த்தும் பாடம் கற்கலாம் ….!

ஆறடி நிலம் கூட

உறுதியில்லாத வாழ்வில்,

கொண்டு போவதற்கு

என்ன இருக்கிறது ….?

வாழ்ந்த நாளில்

உனக்கு பயந்து எத்தனை பேர்

உன்னுடன் வந்தார்கள்

என்பது பெரிதில்லை …..

உன் கடைசி யாத்திரையில்

கண்ணீருடன் வருகிறவர்களின்

எண்ணிக்கை

நீ வாழ்ந்த

வாழ்க்கையை சொல்லிவிடும் ….!

மனிதனாய் பிறப்பது எளிது ….

மிருகமாய் வாழ்வது எளிது …..

தெரு நாயைப்போல்

செத்துப்போவது எளிது …..

நீ

மனிதனா ….?

மிருகமா ….?

உன் கடைசி யாத்திரையில்

கண்ணீருடன் வருகிறவர்களின்

எண்ணிக்கை நீ வாழ்ந்த

வாழ்க்கையை சொல்லிவிடும் ….

எனக்கே, எனக்காக .. கண்ணீரோடு காதல் சொல்லிப்போ ...

2011-09-29T15:10:00.002+05:30

நன்றி பதிவர் தென்றல் செப்டம்பர் 2012

இடமாற்றுப் பிழை நீ எனக்கு ....

கடவுள் அப்படி ஒன்றும்
நல்லவனில்லை ....

பிறர் துன்புறுவதை கண்டு
இன்புறும் கொடிய
மனம் படைத்தவன் ....

இல்லாதிருந்தால்,

உயிரின் பகுதியே ...!
உன்னை படைத்தவன்
என்னையும் படைத்திருப்பனா ...?

பொய்கள் எல்லாம் மெய்களாய் ,
மெய்கள் பொய்களாய்
மாறிப்போன இடமாற்றுப் பிழை
நீ ....

இரவில் வரும் நிலவில்
ஆரம்பித்து
மாலை வரும் தென்றல் வரை
உன் நினைவுகளை என்னுள்
பதியமிட தவறுவதில்லை ...

விடியற் நேரம்
துளிர்க்கும் புல் நுனி
பனித்துளி கண்டு
என் பசலையில் துளிர்த்த
உன் கண்ணீர்த் துளியோ என
என் மனம் உடைந்து அழுகிறது ...

பொய்யில் மெய் கண்டு
பொய் என தெரிந்தும்
பொய்யாய் வாழும் சுகம் தேடி
உன் நினைவு போதையில்
திரிவதும்
ஒரு வகை தவம் தான் ...!

தவத்திற்கு தவமேற்றி
இந்த உடல் உயிரை
அடைந்து முழுமை பெற
என் உயிரின் ஆதாரமே ...!

நீ வா ...

அல்லது,

எனக்காக ...
எனக்கே, எனக்காக …
ஒரே ஒரு துளி
கண்ணீரோடு காதல்
சொல்லிப்போ ...

கவிஞனாய்
வாழ்ந்துவிட்டுப் போகிறேன் ...!

தாம்பத்தியம் போல் சுயம் கொண்டது முதுமை ...!

2011-09-28T15:58:00.000+05:30

வாழ்க்கையும் வாழ்பவர்களும் .....

முதுமை வாழ்வின்

மொழி...!

வாழ்பவர்களுக்கு
வாழ்ந்தவர்களின் வழிகாட்டி...!

வாழ்க்கை சுழற்சியின்
இரண்டாவது குழந்தை பருவம்
முதுமை...!

தான் பெற்ற குழந்தையிடமே
தான் குழந்தையாகி போகும்
பரிணாமம் ...!

தாம்பத்தியம் போல்
சுயம் கொண்டது முதுமை ...!

அனிச்ச மலராய்
மனமிருந்தாலும்

வாடுவதை யாரும்
பொருட்படுத்துவதில்லை ....!

சுருங்கிய முகத்தை விட
சுனோ பூசிய முகம்
ஈர்ப்பானதால்,

இரும்பு இதயத்தை  பெற்றவர்கள்
இரும்பு கட்டிலில்
முதியோர் இல்லத்தில் ....!

கிரிச்சில் மகன் ...

முதியோர் இல்லத்தில் பெற்றோர் ...

வெந்ததை அவசரகதியில்
அள்ளிப்போட்டு,
எட்டு மணி பஸ்ஸை பிடித்து,
சம்பாதித்து  என்ன
செய்ய  போகிறோம் ...?

நாளை
எதோ ஒரு முதியோர் இல்லத்தில்
எதோ ஒரு இரும்பு கட்டிலில்
படுத்துக் கிடக்கவா...?

மனிதா ...!
வாழ்க்கை அழகிய கவிதை ....

கூச்சலிடும் குழந்தைகள் ...
கூடத்தில் "டொங் டொங்.."  என
வெற்றிலை தட்டியபடியே
அளவாடும் பெற்றோர் ...
தோட்டத்தில்,
துள்ளி குதித்து திரியும் அணில் ...

நினைத்திடவே ஆனந்தம்
பெருகுகிறது ...

வாழ்க்கையை வாழ்ந்து
பார்க்க வேண்டும் ...

நாட்களை  நகர்த்திப் போவது
பாவம் ...!

வாழ்கையை வாழாமல்
வெந்ததை தின்று
பணத்தின் பின் திரிதல்
பிணத்திற்கு சமம் ...!

நாளைய நமது
முதுமை சுகமாய் இருந்திட ,

நமது குழந்தைகளுக்கு
நாம் தான் கூட்டுக் குடும்ப
வாழ்க்கையை சுவைக்க
கொடுக்க வேண்டும் ...!

வாழ்க்கை அழகான கவிதை ...!

கூச்சலிடும் குழந்தைகள் ..
கூடத்தில் அனுபவ முதிய பெற்றோர் ...
மிகவும் ஆதரவாய், பாதுகாப்பாய்
உணரும் நம் மனம் ...!

வாழ்க்கை சுழற்சியின்
அழகிய பருவம்
முதுமை ..!

கடைசி பிச்சை …

2011-09-22T15:50:00.003+05:30

கடைசி பிச்சை …

ஊனப்பட்டுப்போன

மனம் படைத்தோர்

வாழும் உலகில் …

சிற்பியின் கவனச்சிதறல்களால்

சிதறிப்போன

கண்ணாடி சிதறல்கள்

நாங்கள்.....

ஊனமனது வார்த்தை

பிரதிபலிப்பால்

சுருங்கி துடிப்பது

எங்கள் இதயம் மட்டுமல்ல

எங்களின் மனமும் தான் ....!

ஆண்பால் ...

பெண்பால் ...

என்று பிரிக்க தெரிந்த

வக்கிர மனதுக்கு

மூன்றாம் பாலினத்தை

உச்சரிக்க தைரியமில்லை ....!

உடல் ஊனம் என்றால் கூட

செயற்கை உறுப்புகள் உண்டு ...

மன ஊனத்திற்கு ....?

மாற்று பாலினம் என்று

ஒதுக்கியதால்,

பசியரக்கன் முன்

பிச்சைக்காரர்களாய் ...

பால் மாறிப்போனதால்

பாலியல் வெறியர்களில்

பார்வையில் பாலியல்

தொழிலாளியாய் ....

இறைவனை நோவலாம்

என்றால்,

அவனும் கூத்தாண்டவர் கோவிலில்

எங்களுக்கு போட்டியாய் ....

இனி பொறுப்பதில்லை ...

குட்ட, குட்ட குனிந்து

கூன் போட்ட புற முதுகும்

எங்களுக்கு தேவையில்லை ....

மனிதர்கள் வாழ வேண்டிய

பூமியில்

மனிதத்துவம் மறந்து

வாழ்வோரே ...!

உங்களிடம் எங்களின்

கடைசி பிச்சை ....

எங்களை நீங்கள்

மூன்றாவது பாலினமாய்

ஏற்றுக்கொள்ள வேண்டாம் ....

அது எங்கள் உரிமை ...!

தரங்கெட்ட வார்த்தையால்

மனதை காயப்படுத்துவதை

தவிருங்கள் ...!

தெருவில்,

தெரு நாயை கல்லெடுத்து

அடித்தால் கூட,

கேட்க ப்ளூ கிராஷ்

என்று ஓன்று உண்டு ....

எங்களுக்கு ....?

மனிதர்கள் வாழ வேண்டிய

உலகில்

மனிதர்களுடன் மனிதர்களாய்

வாழ ஆசைப்படுகிறோம் ....!

கடைசி பிச்சையாய் ....

மனிதா....!

சகோதரத்துவம்

போற்றுவாய .... ?

தினமலர் வாரமலரில் இடுகாட்டில் காத்திருப்பேன் ....!

2011-07-19T15:03:00.001+05:30

நன்றி தினமலர் வாரமலர் 17/07/2011

இடுகாட்டில் காத்திருப்பேன் ....!

என்னைக் கொண்டே
என் மூளை
செல்களுக்குள்
உன் பெயரை
பச்சை குத்திக் கொண்டவளே...

உன்னுள் கரைந்து
உன் காதலில் நான்
தாய்மை அடைந்தேன்!

என் மனம்
உன்னால் குப்பையாய் போனதால்,
நீ தீண்டி குப்பையில்
போட்டவைகள் எல்லாம்
பொக்கிஷமாய் என் அறையில்!

சிவந்து சிரிக்கும்
முற்றத்து ரோஜா...

தாவி ஓடும்
கொல்லைப்புற அணில் குட்டி...

ஒவ்வொரு நிகழ்வும்
நொடிக்கொரு தரம்
உன் நினைவுகளை
என்னுள் புதுப்பித்துக் கொண்டே
இருக்கிறது!

எல்லா பெண்களையும்
போல் தானே நான்,
என்னிடம் புதுமையாய்
எதை கண்டாய்
என ஏளனமாய் கேட்டாய்!

பிரியமே...
என்னை உன்னில்
மட்டும் தானே காண முடிகிறது!

வாழும் போது ஒருவராய்
வாழும் நாம்...
மரிக்கும் போது மட்டும்
நான் சிறிது
முந்திக் கொள்ள ஆசைப்படுகிறேன்!

உனக்கு முன்
நான் மரித்து,
மக்கி, மண்ணாகி
உன்னை மலர் போல்
தாங்க,
இடுகாட்டில் காத்திருப்பேன்!

பாக்யா வார இதழில் சாயம் போட்ட மனிதர்கள்

2011-07-05T17:25:00.000+05:30

நன்றி பாக்யா 8-14/07/2011

கல்கி வார இதழில் நிறைவேறிய எனது ஏக்கம்...

2011-06-28T16:10:00.000+05:30

நன்றி கல்கி வார  இதழ் 03/07/2011

                                       ஏக்கம்


மாமர ஒற்றைக் கிளையில்

குயில் கச்சேரி...

தாவித் தாவி நடனமிடும்

அணில்...

மார்கழி காலை

குளிரில் போர்வைக்குள்

பூனைக்குட்டியாய்

கடைசி ஐந்து நிமிடத்

தூக்கம்...

ரசித்திட ஆசை...

ஞாயிறு வருமென

சமாதானம் சொன்னது

இயந்திர வாழ்க்கை!

கல்யாண சந்தையில் பாக்யா வார இதழ்

2011-05-23T18:55:00.000+05:30

நன்றி பாக்யா - மே 27- ஜூன் 2 , 2011

பாக்யா வார இதழின் பார்வையாளர்கள் நேரம்

2011-04-14T15:18:00.000+05:30

நன்றி பாக்யா 15-21/04/2011

தினமலர் வாரமலர் வீரிய வித்தா ...?

2011-04-11T16:24:00.004+05:30

நன்றி தினமலர் வாரமலர் 10/04/2011

வீரிய மிகு வித்து....!

ஒரு மணிநேரத்திற்கு
விலை பேசினால்
-விலைமகள் ..!

ஆயுளுக்கும் விலை பேசினால்
-கணவன்..!

பத்து நிமிடம் உடலை
சுமப்பவளுக்கு கொடுக்கும்
அங்கீகாரத்தை கூட,
பத்து மாதம்
தன் விந்தை
சுமப்பவளுக்கு கொடுப்பதில்லை
இந்த அசிங்கம் பிடித்த சமூகம்...!

பதினாறில்
பெற்றவர்களின் சொல்லில்
சிறையாகி ...

இருபதில்
மூன்றுமுடிச்சில் சுயம் தொலைத்து...

ஆறுபதில்
தன் தொப்புள்கொடியே
பாரமாய் நினைக்கையில் ....

மரமாய் ...

மரம்
பூப்பதுண்டு ....
சூடிக்கொண்டதில்லை....

மரம்
காய்ப்பதுண்டு ...
புசிப்பதில்லை....!

அதனால்,
சில மரங்கள்
முதியோர் இல்லங்களில்...

வீட்டிற்கு ஒரு மரம்
வளருங்கள்...
ஆனால்,
பெண்களை மட்டும்
மரமாய் வேண்டாம்....

அடுத்த தலைமுறையின்
வீரிய மிகு வித்து
அவள் ....!

இப்படிக்கு, காதல் …

2011-03-15T17:38:00.003+05:30

நெஞ்சமெல்லாம்
நீ வீசிவிட்டுப்போன
ஆழிக்காற்று ….

புயல் அடித்து
அடங்கிய பிறகும்
அலைகள் ஓய்ந்தபாடில்லை ….!

என்றேனும் கரைக்கு
நீ வருவாய்
என்ற ஆவலில்
கரை மோதி
நீ இன்றி ஏமாந்து
கடல் திரும்பும் அலைப்போல் ,
என் மனம் ….!

உன்னுள் இடிக்கும் இடிக்கு
என்னுள் வெள்ளக்காடாவது
தவிர்க்க முடியவில்லை …!

காதலிக்க இரு மனங்கள் போதும் …!
ஆனால் ,
திருமணத்திற்குத்தான்
எத்தனை தடைகள் … ?

நான்
உன் ஜாதி இல்லை …
நான்
உன் மதமில்லை ….
ஆனால் ,
நான் உனக்கு நல்ல
துணையாய் இருப்பேன் …!

என்னின் பிரதியே …!
இந்த சமுகம்
நம் மீது ஆழிக்காற்றை வீசினால் ….
ஆழிக்காற்றுக்கு நெஞ்சையும்
உனக்கு தோளையும்
தருவேன் …!

திசை பற்றிய எண்ணம்
மடிந்து துடுப்பற்ற
இந்த படகிற்கு துடுப்பாய்
என்னை இயக்க வருவாயா …?

இப்படிக்கு,
காதலை மட்டுமே
உண்டு சுவாசித்து
உனக்காக காத்திருக்கும்
காதல் … .!

ஒரு முறையே பூக்கும் பூவிது ...!

2011-02-22T18:44:00.003+05:30

காதலுக்கும்
காமத்திற்கும்
நூலிடை வித்தியாசம் தான் ....
உடல் மேல் போர்த்திய
ஆடையை போல்...!

இதயம் பாறையாய்
தவம் கிடக்கும்
தன்னை சிலையாய்
செதுக்க போகும்
உளிக்காக ....!

கண்களால் தழுவி
இதயத்தால் புணர்ந்த
காதல் தாஜ்மகாலாய்
நிமிர்ந்து நிற்கும் ...!

மெய்யற்ற மெய் மேல்
கொண்ட காதல்
நிமிடங்களில் வடிந்து போகும் ....!

ஒரு மொட்டில் ஒரு மலர்தான் ....

இறைவனடியும் சேர்க்கலாம் .....
இறுதி ஊர்வலத்திலும் .....

காதலிக்கும் முன் யோசி
அது காதல்தானா
என்று ....

நீ உன் பெற்றோரை விட
புத்திசாலித்தான்..!

அனால் ,
கயவர்கள் அதைவிட
புத்திசாலிகள் ...!

காதலுக்கும்
காமத்திற்கும்
நூலிடை வித்தியாசம் தான் ....

உனக்கு பகுப்பதில்
குழப்பமெனில்
உன் பெற்றோரிடம்
விட்டுவிடு ...!

உன் நலனில் அக்கறையுள்ளவர்கள்
வேறு யார்
இருக்கபோகிறார்கள்...?

ஏன் எனில் ...

ஒரு மொட்டில் ஒரு மலர்தான்
பூக்கும்....!

தொலைத்து விட்டு தேடுகிறேன் ...

2011-02-04T16:09:00.001+05:30

தொலைத்து விட்டு தேடுகிறேன் ...

இரவெல்லாம் ஒட்டி உறவாடி
விடியற் நேரம்
நாணத்தோடு விட்டுப்பிரிய
மனமின்றி
ஒட்டிப்பிரியும்
புல் நுனி பனித்துளி ....

கொலுசொலியில் பாதை
மயங்கி
கல் தட்டி நகக்கண் பெயர ,
"அம்மா" என்று நான் அலற
"அச்சச்சோ '" என எனக்காய் ,
எனக்கே எனக்காய்
நீ வீசிய பரிவுப்பார்வை ...

வருடினார்ப்போல்
நீ விளக்கி வைக்கும் பாத்திரங்கள்....

செல்லமாய் உன்மேல்
குதித்து விளையாடும்
பாமொரியன் ...

எனக்கு பசலையை
உண்டாக்கும் பதிவுகள் ...!

நீர் ததும்பும்
உன் விழிகளில் இருந்து
துளி தெரித்து விழும் முன்
உடைந்து விழுகிறது
என் உயிர் ....!

உன் சத்தமில்லா
கொல் என்ற சிரிப்பு
நீ அருகில் இல்லாத போதும்
உயிரோடு எரித்து கொல்கிறது ....!

உன் நினைவுகளில்
என்னை நான்
புதுப்பிக்கிறேன் ....

சில சமயம்
தொலைத்துவிட்டு தேடுகிறேன் ...!

உன்னால் என் மனம்
குப்பையாய்யானதால்
நீ குப்பையில் வீசியவைகள்
எல்லாம் பொக்கிசமாய்
என்னுடன் ...

குப்பைகளை எல்லாம்
குப்பையில் சேர்க்க
என்னிடம்
நீ
வருவாயா ...?

நாளை என்பது ...!

2011-01-28T15:26:00.001+05:30

நாளை என்பது ...!

நாளை என்பது
உடலை உயிரோடு
ஒட்டிவைக்கும் நம்பிக்கை...!

இன்றைய பசியை
நாளை கிடைக்கப்போகும்
உணவு பசியாற்றாது....
ஆனால்,
நம்பிக்கையூட்டும் ....!

நாளை
விருட்சமாவோம் என்ற
நம்பிக்கையில் தான்
பிரமாண்ட மரம் கூட
சிறு விதையுள்
தன்னை சுருக்கி
தவம் கிடக்கிறது ...!

நாளைய நம்பிக்கைத்தான்
இன்றைய அவமான
வலிகளுக்கெல்லாம் மருந்து ...!

நம்பிக்கை இழந்தவன்
தன்னை இழந்தவன் ...!

நேற்றைய விதைப்பே
இன்றைய உணவு ...!

அறுவடைகள்
காலதாமதமாகலாம்
ஆனால்,
பொய்ப்பதில்லை ...!

மரத்திற்கு பழம்
சுமையாகலாம்
ஆனால்,
நீ உனக்கு சுமையாக கூடாது ...!

அடுத்த நொடியும்
உயிர் வாழ்வோம் என்ற
நம்பிக்கைத்தான்
வெளிவிட்ட காற்றை
மீண்டும் நுரை ஈரல்
நிறைக்கிறது....!

நம்முன் தட்டில் கிடக்கும்
ஒவ்வொரு பருக்கையும்
அடுத்த நொடி நாம்
உயுரோடு இருந்து
உண்ண போகிறோம்
என்ற நம்பிக்கையின் வெளிப்பாடு ...!

வா ... நாளையை
ஒரு கை பார்ப்போம் ...!

உள்ளர்ப்பனத்தோடு உழை ...!

நாளை, உன் வீட்டு
வேலைக்காரனாகும் ...!

நாளை என்பது
உடலை உயிரோடு
ஒட்டிவைக்கும்
நம்பிக்கை பசை ...!

தினமலர் வாரமலரில் நான் வாழ்ந்த வாழ்கை

2011-01-27T14:42:00.000+05:30

நன்றி தினமலர் வாரமலர் 23/01/2011

வா வாழ்ந்து பார்க்கலாம் …!

வாழ்கை அழகான கவிதை …
வாசிக்கவும் செய்யலாம்..
கசக்கி தூர
வீசவும் செய்யலாம் …!

உயிர் சுழற்சி
காமம் சம்மந்தப்பட்டது…..!

காமம் மனம் சம்மந்தப்பட்டது…..!

அடுத்தவனின் மரணம்
தரும் பயம்
வாழ்கையை சொல்லித்தரும் …!

பயந்த மனம் பயத்தில்
இறந்த கால நினைவுகளில்
ஆறுதல் தேடும் ..!

எதிர்கால கனவில்
ஒளிந்துக்கொள்ள பார்க்கும் …!

நிகழ்காலம் மட்டும்
எட்டிக் காயாய் ….

தன்னை பதிவு செய்துக்கொள்ளும்
போராட்டத்தில்
பல முகங்கள் சூடி
தான் தொலைந்து போன
பரிதாபம் …

வீணான மிச்சங்கள்
கூட சில உயிர்களுக்கு
உணவாகும் ……
வீணாய் முடங்கிக்கிடப்பவன்
தனக்கே சுமையாவான் ….!

முட்டி, முட்டி ஓட்டை
உடைத்துத்தான்
கோழி குஞ்சு கூட
வெளிக்காற்றை சுவாசிக்கிறது…..

உன் வாழ்கை
உன் முன்னே…

வாழ்கை அழகான கவிதை …
வாசிக்கவும் செய்யலாம்..
கசக்கி தூர
வீசவும் செய்யலாம் …!

கடைசி நாளில்
சிலரின் சில கண்ணீர் துளிகள்
தான்
வாழ்ந்த நாளில்
நாம் சேர்த்து வைத்த சொத்து ……!

வா மனிதனாய்
வாழ்ந்து பார்க்கலாம் …!

சிற்றிதழ் அறிமுகம் - முதற்சங்கு

2010-12-09T14:26:00.010+05:30

இலக்கியம் என்ற வார்த்தைக்கு பொருள் கொள்வதிலேயே எனக்கு நீண்ட தேடல்உண்டு.
பொருளாதாரத்தை ஆதாரமாககொண்ட பத்திரிக்கைகளில் முதல் படியிலேயே தோற்று சிற்றிதழ்கள் பக்கம் சென்றால் அங்கு, ஈசல்களைப்போல் பல! அதற்குள்ளும் " யார் " (?!) இலக்கியம் என்ற ஆரோக்கியமற்ற சர்ச்சைகள்!!

இறுதியாக, அல்ல! அல்ல!! நல்ல தொடக்கமாக மலர்ந்திருக்கிறது முதற்சங்கு மாத இதழ், தரமான படைப்புகளோடு!

வளர்ந்துவரும் எழுத்தாளர்களில் முக்கியமானவரும், நமது பதிவருமான
ஐரேனிபுரம் பால்ராசய்யா முக்கிய இடம் பிடிக்கிறார். அவரது சமூக ஆராய்ச்சி கட்டுரைகள் நம்மை மலைக்க வைக்கின்றன!

அக்டோபர் இதழில் கணியான் இனத்தை குறித்த அவரது ஆராய்ச்சி கட்டுரையை படிக்க http://idaivelikal.blogspot.com/2010/11/blog-post.html
இங்கு கிளிக் செய்யவும்.

மாதம், மாதம் எழுத்தாளர்கள் அறிமுகம் என்ற பகுதியில் வளரும் எழுத்தாளர்களை அறிமுகம் செய்கிறார்,ஐரேனிபுரம் பால்ராசய்யா!

இலக்கியம் நாடுவோரின் தரமான இதழான முதற்சங்கிற்கு அனைவரும் ஆதரவுதர வேண்டுகிறேன்.

முகவரி

ஆசிரியர் திரு.சிவனி சி சதீஷ்
முதற்சங்கு
த,பெஎண்25 இரணியல் சாலை
தக்கலை 629 178
கன்னியாகுமரி மாவட்டம்
கைப்பேசி 9442008269

அக்டோபர் இதழில் அடியேனைப் பற்றி … .(பெரிய தாக்க மவுசை கிளிக்கவும்)

ஓர் இந்தியனின் மன்னிப்பு கடிதம்…..!

2010-11-01T20:49:00.006+05:30

ஓர் இந்தியனின் மன்னிப்பு கடிதம்…..!

அஹிம்சையை போதித்தவனுக்கு
நெஞ்சில் துப்பாக்கி இரவையை
பதக்கமாய் அணிவித்துவிட்டு
ஓட்டுப்போட பணம்
பெற்றுக்கொள்கிறோம் …!

ஜாதிகள் இல்லையடி பாப்பா
என்றவனின் நினைவு நாளில்
அவனின் புகைப்படத்திற்கு
மாலை அணிவித்த கையோடு
ஜாதிவாரி கணக்கெடுப்பிற்கு
உடன்படுகிறோம் …!

செக்கிழுத்துபெற்ற
சுதந்திரத்தை
டாஸ்மார்க்கில் தேடுகிறோம் …!

வெள்ளையன்
அவுட் ஆப் பேஷனாய் போனதால்
ஏமாற்றுக்காரர்களின் வெள்ளை உடை
பேஷன் ஆனது ....!

அடிமைத்தனத்தையும்
சுகமான சுமையாகவே
அனுபவிக்க கற்றுக்கொண்டோம்..!

எங்கள் உரிமையை
நாங்கள் விட்டுக்கொடுப்பதும் இல்லை...
பணமாகவோ மூக்குத்தியாகவோ
கொடுத்தால் மட்டுமே ஓட்டு ..!

மகாத்மாவே …!
பாரதியே …!
தயவு செய்து மீண்டும்
வந்து விடாதீர்கள் .......!

எங்களுக்காக நீங்கள்
சிந்தும் இரத்தத்தை கூட
என்ன குருப் என வகை பிரித்து
காசாக்கி விடுவோம் ...!

கோவணம் போதும் என்றால்
மேலாடை எதற்கு என்று
உருவி விடுவோம் …!

உங்களிடம்
எங்களை மன்னிக்கும்படி
கேட்க எங்களுக்கு தகுதியில்லை .....

எங்களை திருத்த
இனி நீங்கள்
தடியை தூக்கிப்பிடித்து
வந்தால் மட்டும் தான்
முடியும் .....!

வருவாயா ...? ? ?

கர்ப்பம் தரித்த நினைவுகள் ....!

2010-10-18T19:31:00.006+05:30

கர்ப்பம் தரித்த நினைவுகள்....!

கோவில்வேப்ப மரத்தில்
குழந்தை கனவுடன் கட்டப்பட்ட
துணித்தொட்டில்களைப்போன்ற
உன் நினைவுகளில்
என் இதயம் தாய்மை
அடைந்து தவிக்கிறது…!

உன் மெளனமொழியில்
என் தாய் மொழி
மறந்துபோயின…!

நீ உதடு குவித்து
காற்றில்
பறக்க விட்ட முத்தங்களுடன்
வாழ்ந்து வருவதால் ….
மற்றவர்கள் சூழ்ந்திருக்க
விதவனைப்போல்
தனிமைப்பட்டு நிற்கிறேன்…!

மார்கழி மாத பனிக்காற்று
என் முகற்றை வருடும்
போதெல்லாம்….
பேருந்தில் எதேச்சையாய்
என் முகத்தை வருடிய
உன் கூந்தலின் நினைவுகளை
என்னுள் கிளிறிவிட்டு
போய்விடுகிறது ….!

உன் காந்தப்பார்வை
நிழல் நினைவுகள்
நிஜமாகாதா என்ற ஏக்கம்
சுகமான சுமையாகவே
என்னுள்
உனனோடு ….!

நிஜமின்றி நிழல் இல்லை…!
நிழல் இன்றி நிஜமில்லை …!

கர்ப்பம் தரித்த
நினைவுகளுடன்
காலம் போகும் முன்னே
நம் பிள்ளைகளை
கொஞ்ச நீ
வருவாயா....?

தினமலர் வாரமலரும் எனது "அந்த கண நேரமும்" ...!

2010-10-05T15:10:00.005+05:30

அந்த கண நேரம் !

தொழுநோயாளியின்
நமச்சலைப் போல்
மறுபடியும்,
மறுபடியும்...
உன் நினைவுகள்...

ஊர் உறங்கிய பிறகும்,
நீ உறங்கியிருப்பாயா
என்ற நினைப்பில் நான்!

நிலா, நிலா ஓடி வா
என்று என்
தாய் எனக்கு
அறிமுகப்படுத்திய
நிலவிற்கும்,
நீ எனக்கு அறிமுகமான பிறகு,
வரும் நிலவிற்கும்
நிறைய வேற்றுமைகளை
உணர்கிறேன்!

காரிருளை
காணும் போதெல்லாம்
விளக்கேற்ற வேண்டும்
என்ற எண்ணம் மடிந்து...
உன் செந்நிற முதுகில்
கார் கூந்தல் புரளும்
இடைவெளியில்
கடுகளவில் கிடக்கும்
அந்த
அழகிய மச்சம்...
மறக்க முயன்றாலும்
தவிர்க்க முடியவில்லை!

மவுனமாய்
பேசும் உன் விழிகள்
என் மனதை
புணர்ந்து போன
அந்த கண நேரம்...

காத்துக் கிடக்கிறேன்
போதை வஸ்து
அடிமையைப்போல்...

மற்றொரு
பார்வைக்காக!

தினமலர் வாரமலரில் நான் கண்ட " கலர் கனவு "

2010-08-05T14:05:00.001+05:30

நன்றி தினமலர் வாரமலர் 01/08/2010

கலர் கனவுகள்...!

வானமகள்
வெட்கமில்லாமல்
மின்னலாய் பல் இளித்து
போனாள்...!

வானுயர மாளிகையை
கட்டிய தொழிலாளி
ஒதுங்க இடமின்றி
கட்டிட செல்வ செழிப்பை
பறை சாற்ற
நட்ட குரோட்டன்ஸ் வகை
மரங்களுக்கு இடையே
மரமாய் ஒட்டி
அன்னாந்து பார்த்து
தனக்குள் வியந்தான்....
இது நான் கட்டிய
கட்டிடமாக்கும் ....!

குடை பழுது நீக்குபவன்
பிறர் மழையில் நனையாமல்
இருக்க,
தன் வயிறு நனைய...
மழையில் நனைந்தபடி குடை
பழுது பார்த்துக் கொண்டிருந்தான்...!

இங்கே,
வேதாந்தம் கூட
சுகமாய் உணரப்படும் ...
எதை கொண்டுவந்தாய்
இழப்பதற்கு...?

இந்த
ஒரு வார்த்தைதான் ....
தாய் மடியாய்,
கலர் கலர் கனவுடன்
சுகமாய் தூங்க வைக்கிறது ...

விடியலில் வேதாந்தம்
பசியின் முன்
காணமல் போக,
எதுவுமே பெரிதாய்
தெரியவில்லை ...

உணவையும்...
ஆறுதல் தரும்
பொய் கனவுகளையும் தவிர....!

குமுதம் வார இதழில் மாப்பிள்ளை ....

2010-07-14T14:45:00.002+05:30

நன்றி குமுதம் 14/07/2010

கலர் தமிழா நீ ரெடியா...?

2010-06-30T17:24:00.000+05:30

நன்றி புரட்சிவேந்தன்: 30/05/2010 & 15/06/2010

ஒரு தட்சணாமூர்த்தி கருணாநிதியான கதை .....

2010-06-09T15:33:00.000+05:30

நன்றி புரட்சிவேந்தன்: 15/06/2010

கலைஞரை அரசியலுக்கு இழுத்துவந்த நீதி கட்சி ...

2010-06-08T17:36:00.000+05:30

நன்றி புரட்சிவேந்தன்: 15/06/2010

குமுதம் வார இதழும் எனது எதிர் வினையும்

2010-06-08T16:37:00.000+05:30

நன்றி குமுதம் : 09/06/2010

தினகதிர் வாரகதிர் இதழில் எனது பிரியமான சுவாச கனவு

2010-05-05T16:33:00.001+05:30

நன்றி தினகதிர் வாரகதிர் 28/02/2010

பிரியமான சுவாச கனவிற்கு....!

உன் ஒவ்வொரு
அசைவும்
பசலையாய்
என் ஒவ்வொரு அணுவையும்
தின்று கொண்டிருக்கிறது ...

கல்லூரி கடைசி நாள்...
சிறு பிள்ளைக்கு
பஞ்சு மிட்டாய்
கொடுத்து ஏமாற்றுவதுபோல்,
நீ விட்டு சென்ற
உன் பார்வை ...

இன்றும் என்
கருவிழிகளுக்கு பின்னே
கர்ப்பத்தோடு...!

நீ நின்றயிடம்....
நீ ஐஸ்கிரீம் சாப்பிட்ட பார்லர்...
நீ சாப்பிட்டபின் இதழொத்தி
எறிந்த காகிதம்
விழுந்த குப்பைத்தொட்டி ...
ஒவ்வொரு இடத்தையும்
மனதால் மணந்து,
பார்வையால் வருடி...
அந்த சுகத்தில்
வாழ்ந்துக்கொண்டிருக்கிறேன்....!

பொய்யாக இருந்தாலும்
உன்னுடன் வாழும்
அந்த நிமிடங்கள் ...

வேதனையாக இருந்தாலும்
இன்பமாக உணர்கிறேன்...

நீ காதலித்தாயா...?
நான் சுவாசித்தேன்...!

எனக்காகவே நீ
வாழ்வதாய்
இன்றும் நம்பிகொண்டிருக்கும்
என்னை
காலம் ஒரு நாள்
ஏளனம் செய்யலாம் ...

எங்கேனும்,
எப்பொழுதாவது
என் முன்னே தோன்றி
என் சுவாச கனவுகளை
கலைத்து விடாதே ...

சுகமான உன் நினைவுகளுடன்
கடைசி வரை
உறங்கிட வரம் தா ,
தேவதையே ....!

தினகதிர் வாரகதிரில் சீதைகள் தயார்...!

2010-05-05T15:15:00.001+05:30

நன்றி தினகதிர் வாரகதிர் 14/03/2010

சீதைகள் தயார்...!

கத்து வட்டிக்காரனிடம்
கடன் பட்டவனைப்போல்
நிலை தடுமாறி
துடிக்கிறது இதயம்
நீ நடந்து சென்ற பாதையில்....

உன் பார்வை
தீண்டும் கணங்களில்
மின்சார தகன மேடையில்
வைக்க பட்டவனைப்போல்
செயலற்று கிடக்கிறேன்...

உன் சங்கு கழுத்தை
திருப்பி
புன்னகை பூவை
மலர விட்டு போகும்
உன் வாசம்
என்னை கட்டி இழுத்து
போகும்
உன் பின்னே ...

இதெல்லாம்
நீ விடலையாய் இரவல் வாங்கி
மயக்க நினைத்த
கவிதை வரிகள் தான்...

இதெல்லாம் வேண்டாம்
இராவணனே...!
வரதட்சணை கம்பிகளை
உடைத்து இந்த
முதிர் கன்னியை
காலமெல்லாம் காதலில்
மூழ்கடிப்பேன்
என்று ஒத்தை வரி
சொல் போதும்...

உன்னுடன் வனவாசம்
என்றாலும் உவப்புடன்
ஓடி வர இங்கே
சீதைகள் தயார்...!

பசியோடு பட்டங்கள்...!

2010-04-15T12:13:00.001+05:30

பசியோடு பட்டங்கள்...!

கருமேகங்கள் ஓன்று கூடி
அழுது கொண்டிருந்தன...

வற்றிய மார்பில்
பச்சிளங் சிசுவை
அணைத்தபடி,
இரத்தத்தை பாலாக்க,
ஒரு துளி இரத்தத்திற்காக
சிக்னலில் ஒவ்வொரு வாகனமாக
அலைந்துக் கொண்டிருந்தாள்
அந்த பிச்சைக்காரி...!

நனையாமல் இருக்க
கோப்புகளுடன் சேர்த்து
பட்டங்களை மார்போடு
அணைத்துக்கொண்டேன் …!

அந்த பச்சிளங் குழந்தையைப்போல் ,
மார்போடு ஓட்டிக் கொண்டது
பட்டம்..!

இடுகாட்டில் காத்திருப்பேன்..!

2010-04-14T13:12:00.003+05:30

இடுகாட்டில் காத்திருப்பேன்..!

என்னைக் கொண்டே
என் மூளை
செல்களுக்குள்
உன் பெயரை
பச்சை குத்திக்கொண்டவளே...!

உன்னுள் கரைந்து
உன் காதலில் நான்
தாய்மை அடைந்தேன்!

என் மனம்
உன்னால் குப்பையாய் போனதால் ,
நீ தீண்டி குப்பையில்
போட்டவைகள் எல்லாம்
பொக்கிசமாய் என் அறையில்..!

சிவந்து சிரிக்கும்
முற்றத்து ரோஜா...

தாவி ஓடும்
கொல்லைப்புற அணில் குட்டி ..

ஒவ்வொரு நிகழ்வும்
நொடிக்கொருதரம்
உன் நினைவுகளை
என்னுள் புதுப்பித்துக்கொண்டே
இருக்கிறது …!

எல்லா பெண்களையும்
போல் தானே நான் ,
என்னிடம் புதுமையாய்
எதை கண்டாய்
என ஏளனமாய் கேட்டாய் ...

பிரியமே..!
என்னை உன்னில்
மட்டும் தானே காண முடிகிறது...?

வாழும் போது ஒருவராய்
வாழும் நாம்..
மரிக்கும் போது மட்டும்
நான் சிறிது
முந்திக்கொள்ள ஆசைப்படுகிறேன் ...

உனக்கு முன்
நான் மரித்து,
மக்கி, மண்ணாகி
உன்னை மலர்ப்போல்
தாங்க,
இடுகாட்டில் காத்திருப்பேன்... !

வாழ்க்கை நாடகம்...!

2010-04-13T17:10:00.002+05:30

வாழ்க்கை நாடகம்...!

நாடகம் நடக்கிறது
இயக்குனர் யாரென்று தெரியாமலே...!

முகத்திற்கு முன்னே
பணக்கட்டுகள் ...
பிடித்திட ஓடிக்கொண்டே
இருக்கிறேன் ....

என் தோளின் மீது
ஒருவன் அமர்ந்துகொண்டு
என் முன்னே பணத்தை
கட்டி தொங்கவிட்டு
வேடிக்கை பார்க்கிறான்
என்பதை அறியாமலே...

பொருளே பிரதானமான
பொருளாதார உலகில்
உறவுகள் விலை பொருளாய்...

தகனம் கூட தனமில்லையேல்
தாழ்வாரத்தில் அழுகும், உடல்..!

சேர்த்து வைத்த
பணம் எல்லாம்
வெறும் காகிதம் என்று தெரியவரும்
முதுமையில்....

நல் உறவுகளை
இளமையில் சேர்த்து
வைக்காததால்,

பணத்தை துரத்தும்
வாழ்க்கை பயணத்தில்
தொலைத்து விட்ட உறவுகளை
முதுமையில் தேடி திரிந்து
பலனில்லை...!

மனிதா...!
வாழ பணம் தேவை!

ஆனால்,
பணத்திற்காய்
பொய் வேஷம் கட்டுவதை
கலைந்து ஏறி...!

வாழ்க்கை நாடகம்
காலமெல்லாம் இனிக்கும்!

குமுதம் வார இதழில் எனது பயணம்...

2010-04-05T16:17:00.005+05:30

நன்றி குமுதம் 07/04/2010

பயணம்

சந்தோசமாய் காரில் குடும்பத்துடன் ஊட்டிக்கு சுற்றுலா புறப்பட்ட வசந்திக்கு சரவணனின் நடவடிக்கை எரிச்சலை தந்தது.
டிரைவருடன் வழியெங்கும் சகஜமாக சிரித்து, சிரித்து பேசியபடியே வந்தவன் ஓட்டலில் தங்களுடனே உணவருந்த வைத்தான். ஹைலைட்டாக டிரைவருக்கும் சேர்த்து ஓட்டலில் ரூம்போட்டபோது பொங்கி விட்டாள் வசந்தி.

"என்னங்க இது? டிரைவரையும் சரி சமமா நம்மோட சாப்பிட வைத்துக்கொண்டு..?"

" நம்ம குடும்பத்தோட உயிரையே டிரைவர் கைல கொடுத்துவிட்டு நாம சந்தோசமா பயணிக்கிறோம். அப்போ அவரை சரி சமமா நடத்தினால் என்ன தப்பு?"

"அதில்லைங்க. டிரைவரோட பேசிக்கொண்டே வர்றீங்க..."

" நாம பேசிக்கொண்டே வந்தால் டிரைவரால தூங்க முடியாது. அதனால இரவுல நாம பாதுகாப்பா பயணம் செய்யலாம். அவங்களும் மனிதர்கள் தான். நம்மளோட இப்படிப் டிரைவரா வரும்போது, நாம குடும்பத்தோட இப்படி போக முடியலியேன்னு அவங்க மனசுல ஏக்கம் வரலாம். அதுல கவனம் சிதறினால் நமக்கு தானே ஆபத்து? என்ன சொல்ற வசந்தி"

"சரிங்க. நாளைக்கு டிரைவர் அண்ணாவோட எங்க பாகிறோம்?"

சரவணன் சிரிக்க, வசந்தி வெட்கத்தில் அவன் தோளில் ஐக்கியமானாள்.

குமுதம் வார இதழும் எனது பணமும்..

2010-03-17T14:53:00.005+05:30

நன்றி குமுதம் 24th Feb 2010

ஒரு வார்த்தையில்.... தினமலர் வாரமலர்

2010-03-10T20:30:00.006+05:30

ஒரு வார்த்தையில்....

* உதட்டு சூட்டில்
அருகாமையை உணரும்
சிசுவாய்
காத்துக் கிடக்கிறேன்
உன் கொலுசொலிக்காக...

* ஆர்கானிக் விஷமாய்
உன் பார்வை என்னை
சிறுக சிறுக
அரித்துக்கொண்டிருக்கிறது!

* பசித்திடும் போது கூட,
நீ என்ன சாப்பிட்டுக் கொண்டிருப்பாய்
என்ற எண்ணமே
மேலோங்குகிறது!

* உன் வீட்டு
திரைச் சீலை
காற்றுக்கு விலகும்
போதெல்லாம்
தாயை தேடும் மழலையாய்
ஆடும் என் மனம்...
ஏமாற்றத்தில்
வெளிவந்து விழுந்த
வழித்த எச்சில் இலையை
கண்ட தெரு நாயாய்
சுருங்கி போகிறது!

* உன்னை ஸ்பரிசித்த
சுவாச காற்றை
ஸ்பரிசிக்க...
நீ நடந்து போன
பாதையில் தேடி அலைகிறேன்!

* பத்து முறை எழுதியும்
பத்தாவது கூட தேறாத
நான்...
உன் பார்வை என் இதயத்தில்
உண்டாக்கிய பூகம்பத்தால்
தலையில் இரண்டு
கொம்பு முளைத்து
சுனாமியாய் சுற்றித் திரிகிறேன்!

* இதெல்லாம்,
முக்குத் தெரு,
குட்டிச் சுவற்றில்
கும்பலாய் அமர்ந்திருந்தவர்களுக்கு
மத்தியில்...
என்னை, உன் பார்வை
குறிப்பாய்
தீண்டிப்போன கணத்தில்
இருந்தது தான்!

* என்னவளே...
என்னுள் நிகழ்ந்த
மாற்றங்கள்
உன்னுள்ளும் நிகழ்ந்தனவா?

* ஒரு வார்த்தையில்
உள்ளத்தை சொல்லிவிடு...
* இல்லை என்ற
வார்த்தை மட்டும்
நமக்கு வேண்டாமே!

நன்றி: தினமலர் வாரமலர் - 28/02/2010

கழற்றி எறிந்த முகங்கள்....! [ உரையாடல் போட்டிக்கவிதை]

2010-01-04T16:12:00.002+05:30

கழற்றி எறிந்த முகங்கள்....!

பகலின் எச்சங்கள்
இரவை தின்றுக்கொண்டிருக்கின்றன.. !

வெற்றி களிப்புகள்...
குற்ற உணர்ச்சிகள் ...
காரி உமிழப்பட்ட
எச்சில் துளிகள் ஈரமாய் ...

எண் ஜானின்
ஒரு ஜான் எஜமான்
கட்டளையிடுவதால் ...

தன்மானத்தில்
பட்ட எச்சில் துளிகளை,
வழித்து எறிந்துவிட்டு
அடுத்த பொழுதை
எதிர்கொள்ள
புதிதாய்...

கூச்சல்கள்...
கதறல்கள்...
கெஞ்சல்கள்...
அதிகார சத்தங்களின் முன்
கறைந்து போகிறது...!

எளியவனும்
வலியவனாவான்
தன்னைவிட
எளியவன் சிக்க...!

உடல் வளர்க்க
சூடிய பொய் முகங்கள்
இரவில் மெய் முகத்தை
ஏளனம் பேசும்...!

இயலாமை
கண்ணீர் ஓலங்களை
புணர்ந்து பொய் முகங்களை
அறையெங்கும் பிணங்களாய்
கழற்றி போட்டிருக்கும் ...!

கண்ணீர் துளிகள் மட்டுமில்லை ...
வேதாந்தமும் சுகமாய்
உணர்த்தப்படும் ...
எதை கொண்டுவந்தாய்
இழப்பதற்கு ....?

[ உரையாடல் போட்டிக்கவிதை]

திருக்கல்யாணம்..!

2009-12-17T16:18:00.003+05:30

திருக்கல்யாணம்..!

ஆலயங்களில்
திருக்கல்யாணம்
வருட, வருடம்
தவறாமல் நடக்கிறது...

தவறாமல்,
தாமாகவோ ...
கட்டாயத்தாலோ ...
எல்லா
முதிர் கன்னிகளும்
கலந்து கொள்கின்றனர் ...
தனக்கும் திருமணம்
நடக்க வேண்டும் என்று..!

ஆனால்,
யாரும் நினைவு கூறுவதில்லை ...
தான் கும்பிடும்
கடவுளுக்கு
திருமண சடங்கை
உருவாக்கியவன் ,
வரதட்சணை முறையை
மட்டும் அங்கு
புகுத்தாதலால் தான் ....

திருக்கல்யாணம்
வருட, வருடம்
தவறாமல் நடக்கிறது...!

மூன்றாவது செவி ...!

2009-12-16T15:06:00.003+05:30

மூன்றாவது செவி ...!

படுக்கையில் கூட
இரண்டாவது மனைவியாய்
அருகாமை,
தவிர்க்க முடியவில்லை...!

எப்பொழுதும் உடனிருந்து
கட்டளையிடும்
எஜமானனாய் ...!

குனிந்து பெருக்கும்
எதிர் வீட்டு பெண்ணின்
கலைந்த ஆடைகளுக்கு
இடையே,
தவிர்க்க, தவிர்க்க
அனிச்சையாய் போகும்
கண்களைப்போல்...
இடைஞ்சலாய் உணர்ந்தாலும்
தவிர்க்க முடியவில்லை...!

சண்டை போடாத
மனைவியை அடைந்தவன் போல்,
வாழ்க்கை சுவராஸ்யம்
இழந்து போகிறது...!

சினுங்கா அலைபேசி
காதலி இல்லாமல்
கடற்கரை மணலில்
தனிமையில் காத்திருத்தல் போல்...!

நடந்து போன பாதையில்....!

2009-12-15T15:00:00.004+05:30

நடந்து போன பாதையில்....!

ஒன்பது கிரகங்கள்,
சில கட்டங்கள்,
சிலரது பிழைப்புகள்..!

மனித கழிவை
மனிதனே அள்ள
மாந்தர்களின் அரசியல் ...!

காவித்துணிகள்
அதில் சில
காக்கி உடைகள் ...
காக்கி உடைகள்
அதில் சில
கையேந்தி பிச்சைக்காரர்கள் ...!

சரிநிகர் உயிர்கள்
பாலினத்தால்
பலகீனப்படுத்தப்பட்டு
தன் உரிமைக்காக
33 சதவீதமாவது தா ..
என கெஞ்ச வைக்கும்
முட சமூகம்...!

சமூக விலங்குகள்
நடந்து போன
பாதையெங்கும்
முகங்கள் சிதறிகிடக்கிறது ...
அத்தனையும் போலியாய் ....!

உண்மை முகம் தேடி
தோற்று
என் அறையுள் நுழைந்தேன் ...
அங்கே சில முகங்கள்
சூடி எறியப்பட்டு ...!

பிளாஸ்டிக் உயிர்கள்...!

2009-11-10T16:15:00.003+05:30

பிளாஸ்டிக் உயிர்கள்...!

பிளாஸ்டிக் பூக்கள்
என்று தெரியாமல்
கண்ணாடி கதவுகளுக்குப்பின்
காதலுடன் கலர் கலராய்
பட்டாம்பூச்சிகள்…...

மகரந்த சேர்க்கை
செயற்கையாய் போனதால்
தானும்
பிளாஸ்டிக் பட்டாம்பூச்சியாய்
மாறவேண்டிய கட்டாயத்தில்
பட்டாம்பூச்சிகள்...

அறையெங்கும்
பிணங்கள் ...
அத்தனையும் உயிரோடு...!

குளிர்சாதன அறையுள்
அழகாய் பிளாஸ்டிக் மலர்கள்
அதன்மேல்
பிளாஸ்டிக் பட்டாம்பூச்சிகள்
அழகாய் சொருகப்பட்டு ...!

பஞ்சு நாற்காலியில்
அமர்ந்து மனித இயந்திரம்
இரசித்துக்கொண்டிருந்தது ...

தனக்கு தரப்பட்ட
இரண்டு நிமிட
இடைவேளையுள் ....!

நானும், கலைமகள் மாத இதழும் - கல்லுக்குள் ஈரம் தேடும் நெஞ்சங்கள் ....

2009-10-21T15:41:00.009+05:30

கலைமகள் - செப்டம்பர் ,1993 இதழில் வெளியான எனது கதை

கந்தக தீபாவளி ...!

2009-10-15T15:50:00.002+05:30

கந்தக தீபாவளி ...!

பட்டாசு வெடித்து
தீபாவளி கொண்டாடுங்கள்...!

பட்டாசு சத்தம்
கந்தக பிஞ்சுக்களின்
கால் வயிற்று கஞ்சி...!

கந்தக கிடங்கில்
கருகிய மொட்டுக்களின்
பச்சை இரத்த வாசம்...

மகரந்த கனவுடன்
மொட்டோடு கருகிய
எதிர்கால....
மருத்துவர்...!
பொறியாளர்...!
விஞ்ஞானி ....!

கந்தக குளத்தில்
தன் சந்ததியாவது
மலரும் என்ற நம்பிக்கையில்,
பல செடிகள்
தலைமுறை,
தலைமுறையாய்.....
மலடாய்...!

விடிந்தால்
தீபாவளி....
எங்களுக்கும் தான்....!

கந்தகம் வெடித்து
சிதறும் சத்தத்தில்
எங்கள்
வயிறு சிரிக்கும்...!

கங்கா ஸ்நானம்
செய்யாவிட்டாலும்
கங்கைக்கு ஒன்றும்
பாதகமில்லை....

பட்டாசு சத்தம்
உங்களுக்கு வேடிக்கை...!
எங்களுக்கு
கால் வயிற்று கஞ்சி...!

வாலிபத்தின் தாய்மடி …!

2009-10-08T16:00:00.003+05:30

வாலிபத்தின் தாய்மடி …!

தனிமை இனிக்கும் ...!
உனக்கே நீ பரிச்சயமாவாய்...!

சீரும் நாகத்தை கூட
அழகாய் இருக்கிறது
என்று இரசிக்க தோன்றும்...

இரவெல்லாம் கவி எழுத
முயன்று இறுதியில்
அவள் உருவம் வரைந்து
தலைப்பாய்
அவள் பெயர் எழுதி
பெரும் கவியாகிவிட்டதாய்
காலரை தூக்கிவிட்டுக்கொள்ளும் ....

மழலைக்கு தாய் ...!
இளைஞனுக்கு காதலி ..!
முழுமைக்கும் மனைவி ...!
காதலின் பரிணாமங்கள்..!

காதல் வாழ்க்கையின் மொழி ..!
கவிதை காதலின் வித்து ..!

குழந்தையாய் பிரசவிப்பவள் தாய் ...!
கவிஞனாய் மறு பிரசவிப்பவள் காதலி...!!

அதனால்,
காதலியுங்கள் ….

உனக்கே நீ
பரிச்சயமாக...
உன்னையே நீ
அறிந்துக்கொள்ள ....

காதல் வயப்படல் ஒன்றும்
பாவமில்லை ....
காமமில்லா காதலை
தாய்ப்பாசத்துடன் நீ
அணுகுவதாயின் ....!

தன்மானம் தவிர்....!

2009-09-10T14:28:00.008+05:30

தன்மானம் தவிர்....!

முதல் தேதிக்கு
முன்புவரும் ஞாயிறு....

நாயர் கடையில்,
கருவேப்பிலையோடு,
பச்சை மிளகாய்
மசால்வடை வாசனை
கேலி செய்கிறது ....

டீ -
"மூன்று ரூபாய் ஐம்பது பைசாக்கள்"
-பல் இளித்து
நக்கலடிக்கும் ஸ்லேட்டு வாசகம்..!

நண்பர்களைப்போல்,
உயிரில்லா
ஏ.டி.எம் இயந்திரமும்
மதித்து பத்து ரூபாய்
ஓ.டி தர மறுக்கிறது...

"நாயர், பழைய பாக்கியை
கேட்பாரோ?"
பயம் பத்தடிக்கு முன்பே
தடைபோட்டு நிறுத்திவைத்திருக்கிறது ...

அறிமுகமான யாராவது
டீ குடிக்க வரமாட்டார்களா ...?
காத்திருந்தேன் ...!

ஒரு ஜான் வயிற்றின்முன்
எண் ஜானும்
தோற்றுபோயின....!

முதல் தேதி வராமலா
போய்விடும்...?
முதல் தேதிக்கு
முன்பு வரும்
ஞாயிறை சபித்தபடியே ...

"நாயர்..!
நம்ப கணக்கு எவ்வளவு
ஆச்சு பாரு .. ."
சவடால் குரல் கொடுத்தபடியே
ஒரு மசால்வடையை எடுத்து
முனை கடித்தேன்...

தன்மானம்
முதல் தேதிவரை
தள்ளியே
நிற்கிறேன் என்றது ...!

துணைக்கு உன் நினைவுகள் ...

2009-09-03T18:43:00.007+05:30

ஏக்கம்...!

நீ நின்றயிடம்....
நீ ஐஸ்கிரீம் சாப்பிட்ட பார்லர்...
நீ சாப்பிட்டபின் இதழொத்தி
எறிந்த காகிதம் விழுந்த குப்பைத்தொட்டி ...
ஒவ்வொரு இடத்தையும்
மனதால் மணந்து,
பார்வையால் வருடி...
அந்த சுகத்தில்
வாழ்ந்துக்கொண்டிருக்கிறேன்....!

நீ உன் புதுக்கணவனிடம்
சுட்டிக்காட்டினாய் ,
"அந்த இடத்தில்லிருந்து தான்
ஒரு பைத்தியக்காரன் தினம்
என்னை பார்த்து
சிரித்தான்" என்று ....

தவறு ஒன்றும்
இல்லை, சகியே...!
நான் அங்கு
இருக்கிறேனா என்று
"ஒரு கணம்
"
பார்த்துவிட்டு
பேசியிருக்கலாம்.....!

இருட்டு ...!

வெறுமையான இரவுகள்....
துணைக்கு உன் நினைவுகள் ...
அழகாய் தெரிந்தாள் ....
இருட்டு!

உன்னை நேசிக்க வைத்து ...!

2009-09-01T15:46:00.011+05:30

காதலோடு...!

புதுகவிதையாய் நீ ...
மரபு கவிதையாய் நான்...
நமக்குள் தொடர்ந்து
கொண்டுத்தான்
இருக்கிறது...
முடிவுறா
விமர்சனங்கள்
காதலோடு...!

உன்னை நேசிக்க வைத்து ...!

உன் பார்வை
என்னை
தீண்டும்போதெல்லாம்
அகலிகையாய்
ஆகிடும் நான் ...

என்னை நீ
தவிர்த்திட முயலும்
கணங்களில்
முருங்கையாய்
முறிக்கப்படுகிறேன் ...

மறுபடியும்,
மறுபடியும்
துளிர்த்தெழுந்து
உன்னை நேசிக்க...!

மனசு ..!

உன் இரட்டை
ஜடையில்
ஒற்றை ரோஜா...
ஆடுகிறது மனசு..!

அறியாமை ...!

2009-09-01T14:58:00.008+05:30

அறியாமை ...!

புத்தகத்திற்குள்
மயிலிறகை
வைத்துக்கொண்டு
குட்டி போடும்
என காத்துகிடந்த
அறியாமை
இன்றும்
தொடர்ந்துக்கொண்டுத்தான்
இருக்கிறது ...
கோப்புகளுக்குள்
பட்டங்களை
வைத்துக்கொண்டு ...!

உழைப்(பு) பூ

அழகு
உருவத்திலில்லை
பார்வையில்...!

சுவை
உணவிலில்லை
பசியில்...!

துன்பம்
மனதிலில்லை
பார்வையில்..!

வெற்றி
அதிருஷ்டத்திலில்லை
உழைப்பில் ..!

நாலு விராட்டியும், ஒரு தீ பெட்டியும்........!

2009-07-23T19:33:00.009+05:30

நாலு விராட்டியும், ஒரு தீ பெட்டியும்........!

இரண்டாவது
தாலியாய்
நிறுவன அடையாள அட்டை....!

தவணை முறை
வசதிகளை உதறிவிடவும்
மனமில்லை ...!

வாழ்க்கை
எப்பொழுதும்
முன் பதிவுசெய்த
இருக்கையாய்
அமைந்துவிடுவதில்லை ....

சில சமயம்
காத்திருப்போர் பட்டியலில் ....!

பல சமயம்
முன் பதிவில்லாத இருக்கையில்...

அடுத்த நிறுத்தத்தில்
அமர்ந்திருப்பவர் எழுந்ததும்
அந்த இருக்கை நமக்குத்தான்
என்ற நம்பிக்கையில் ...!

பயண முடிவில்
இருக்கை
வேறு ஒருவருக்கு... !

முதல் வகுப்பில்
பயணித்தாலும்...
முன் பதிவில்லா இருக்கையில்
பயணித்தாலும்...

தேவைப்படுவது
நாலு விராட்டியும்,
ஒரு தீ பெட்டியும் தான்....!

அதுகூட
இன்று சுருங்கி
ஒரு பொத்தானாய் போனது ...!

அடுத்த நொடி
நிச்சயமில்லாதபோது
இந்த நொடியில்
வாழத்தெரியாமல்
அடுத்தவருடன் தன் வாழ்வை
ஒப்புமை படுத்தி
சுயம் தொலைத்து
வேஷம் கட்டவே காலம்
போதவில்லை .... !

நன்றி தினகதிர் வாரகதிர் - செப்டம்பர்,13,2009

தொலைந்து போனவன் ...!

2009-07-03T13:11:00.004+05:30

ஏக்கம்...!

பின்புற தோட்டத்து
மாமர ஒற்றை கிளையில்
குயில் கச்சேரி.....
தத்தி, தாவி
நடனமிடும் அணில்,
இரசித்திட ஆசை...
ஞாயிறு வருமென
சமாதனம் சொன்னது
இயந்திர வாழ்க்கை....!

*************************
தொலைந்து போனவன் ...!

பரணில்
பள்ளி பருவத்தில்
வாங்கிய கோப்பைகளுக்கு
மத்தியில்,
கோப்பைகளாய்
தூசி படிந்து கிடக்கிறது ....
வாழ்க்கை பயணத்தில்
தொலைத்திட்ட இலட்சியங்கள் ....!

*********************

முரண்....!

மோட்டு கூரை
பிய்ந்து வீட்டிற்குள்
பட்டு தெறிக்கும்
மழைத் தூளி கண்டு
துள்ளி குதித்து
குதுகளித்தது
மழலை மனம்....!
வறுமை என
பிதற்றிக்கிடந்தது ....
இயந்திர வாழ்வில்
சுயம் தொலைத்த மனம்...!

விண்ணப்பம் ...! (காதலிக்காத பெண்களுக்கு மட்டும்..)

2009-07-02T19:44:00.006+05:30

விண்ணப்பம் ...!

என் அறையெங்கும்
பொக்கிசமாய் உன் தடயங்கள் ...

உன் தாவணி
கிழித்த வேலிகாத்தான்
முள் முதல்,
உன் பாதம் வருடிய
கருங்கல் வரை ....

என்னை உன்
பொக்கிசமாய்
பரணிலாவது
தூக்கிபோடேன் .....

********************

ஜோடி பொருத்தம் ...!

கோவில் வாசலில்
உன் காலணி அருகே
என் காலணியை
கழற்றிவிட்டு,
பிரிய மனமின்றி
நின்று இரசிக்கிறேன் .....
ஜோடி பொருத்தத்தை ...!
**********************

உன் வாசம்...!

என் சட்டை பைக்குள்
உன் வாசம் ...!
நேற்று நீ
சூடி வீசி எறிந்த
ரோஜாவுடன் உன்
தலை முடிகள்...!

*************************

காதல் ....!

விழி மீன்
தூண்டியலிட
இதய புழு
வழியப்போய்
சிக்கிக் கொள்கிறது ...!

அறிவிப்பு....! (பெட்ரோல் விலை உயர்வு ஏழைகளை பாதிக்காது..! ஓர் அதிர்ச்சி ரிப்போர்ட் ....)

2009-07-02T14:44:00.007+05:30

அறிவிப்பு....!

பெட்ரோல் விலை உயர்வு
அறிவித்தார் அமைச்சர்.....
இது ஏழைகளின் பட்ஜெட்
ஏனென்றால்,
ஏழைகள்
நடந்தல்லவா செல்கின்றனர் ....!

********************************************************

அறிவிப்பு....!

குடிசைகள்
இல்லா
பாரதத்தை உருவாக்குவோம்
அறிவித்தார் அமைச்சர்.....
அவர் கண்பட்ட
குடிசைகள்
பங்களாக்களாக மாறின ...
மக்கள் மட்டும்
நடை பாதையில் .....

-----

பணம் என்பது......!

2009-06-26T18:52:00.009+05:30

பணம் என்பது......!

வயிறு ஓலமிட
உணவு படைத்தல்
பணத்தால் அளவிடப்பட்ட போது,
பணம் உணவானது ....!

நோய் வாய்ப்பட்டபோது
மருத்துவ வசதி
பணத்தால் அளவிடப்பட்ட போது
பணம் மருத்துவனானது...!

உறவுகள் இணைந்திருக்க
பணம் பிரதானமான போது
பணம் உறவுகளை இணைக்கும்
கயிறானது ...!

ஆனால்,
மனித வாழ்க்கைக்கு
என்றுமே
பணம், பணமாக
தேவைப்படவில்லை
என்பது .....

மதிப்பிட முடிகின்ற
காகிதங்களை மீறி
மதிப்பிட முடியாத
மனிதநேயத்தை உணர்ந்தபோது ....

பணம் வெறும்
பண்டமாற்று தான் ...!

முகம் தொலைத்த உடல்கள்....!

2009-06-23T19:23:00.021+05:30

முகம் தொலைத்த உடல்கள் .....

எப்பொழுதாவது வந்து போகும் டவுன் பஸ் கண்ணுக்கு எட்டிய தூரம் மறையும் வரை பார்த்துக்கொண்டே நின்றேன்!

இருபது வருஷம். நேற்று போன மாதிரி இருக்கு. ஆனா, இந்த கிராமம் மட்டும் அதே பதினாறு வயசு குமரி....அன்னைக்கு பார்த்த மாதிரியே ...வயுத்து பாட்டுக்கு நகரத்துல நரகமா தெரியுற வாழ்கை இங்கே, சொர்க்கமா தெரியுது…!

பழைய சம்பவங்களை அசைபோட்ட படியே, வரப்பில் வீட்டை நோக்கி நடந்து கொண்டிருந்தேன். இருபது வருசத்துக்கு அப்புறம் இப்பத்தான் .... திருமணம் கூட சென்னையிலயே நடந்ததால வர வாய்ப்பு இல்லாம போனது.
இப்படியே இன்னும் ரெண்டு பர்லாங் போவணும் ... மாட்டு வண்டி ஏதும் தென்பட்டா நல்லாயுருக்கும் ...போற வழில வாய்க்கால் ஒண்ணு …ஒயிலா பருவ பெண் இடுப்ப ஆட்டி,ஆட்டி நடக்குற மாதிரி வளைஞ்சி, வளைஞ்சி ஓடும்... !
அந்த கரைல ஏதாவது மரத்துக்கு பின்னாடி மறைவா திருட்டு தம் அடிக்கிற சுகம், பைவ்ஸ்டார் ஹோட்டல்ல பாரின் சிகரட் அடிச்சாலும் கிடைக்காது....!
வரப்போரம் என் பால்யகால நண்பன் முனியன் கோவணத்தை பாய்த்துக்கொண்டு, வரப்பை வெட்டி தண்ணீரை அடுத்த பார்த்திக்கு திருப்பிக் கொண்டிருந்தான். ஒட்டிய வயிற்றுடன், தலை முக்கால் வாசி நரைத்து, காலம் அவன் மீது ஆதிக்கம் செய்ய தொடக்கி இருந்தது!

என் தலையை தடவிக்கொண்டேன்! 'டை' கைகர்யத்தில் இன்னும் இளமையாக தான் தெரியுற...!

நான், முனியன், ஐயர் பையன் சங்கரன் இன்னும் ஒரு நாளு, ஐந்து பேர் ஒரு குருப்பாத்தான் அலைவோம். பண்ணாத சேட்டை இல்லை...

முனியான பார்த்த மாத்திரத்தில், அந்த கால நினைவுகள், இளமையை என்னுள் ரீ-சார்ஜ் செய்ய... கையில் இருந்த லக்கேஜை அப்படியே வரப்பில் போட்டு விட்டு, என்னை அறியாமலே, அனிச்சையாய், "டேய்....முனியா ....!" என்றபடியே வயலில் இறங்கினேன்.

சேறு நிறைந்த வயலில் இறங்கும் போது பேண்டை மடித்து விட்டுக் கொள்ள வேண்டும் என்ற உணர்வு கூட இல்லாமல், அப்படியே மண் வெட்டியுடன் சேர்த்து அவனை அலக்காக தூக்கி சுற்றினேன்.

"ஐய்....யா .யா ..." துள்ளிகுதித்து எதோ அவன் தவறு செய்து விட்ட மாதிரி குறுகி நின்றான்!

"டேய்...நான் சரவணன்டா .. ஊ நண்பன் ...ஊ கூட ஒண்ணா ஊரு சுத்தின அதே ... நீ, நான் சங்கரன்லா ஒண்ணா சேர்ந்து சாமியார் தோப்புல மாங்காய் திருடி மட்டிகிட்டோமே ...."

முனியன் மறந்து இருப்பான் என்ற நெனைப்பில் பழையதை நினைவுபடுத்தும் முயற்ச்சியில் இறங்கினேன்!

"இருக்கலாங்கய்யா ...அதுலா, சின்னதுல செஞ்சது ...புத்தியில்லாத வயசு ... தராதரம் தெரியாதது ....அதுக்குன்னு பட்டணத்துல படிச்ச, காரை வீட்டு புள்ள நீங்க எங்க? ..நான் எங்க? ...நமக்கு நம்ம பவுசு தெரியவேணாமாய்யா ...? "

சுதாகரித்துக்கொள்ளும் முன், எங்கோ மறைந்துவிட்டிருந்தான்.

ஒன்றும் புரியாமல் கொஞ்ச நேரம் அப்படியே நின்றுகொண்டிருந்தேன்... நாம் ஏதோனும் தவறு செய்துவிட்டோமோ ...?

யோசனையுடன் நடையை தொடரும் பொது தான் சங்கரன் நினைவு வந்தது.

சங்கரன் சிவன் கோவிலில் பூசாரியாய் இருப்பதாய் அம்மா கடிதம் போடும் போது ஒரு கடிதத்தில் சொல்லியிருந்தாள். சிவன் கோவிலை தாண்டும் போது நினைவுக்கு வர, அவனை பார்த்துவிட்டு போகும் ஆவலில் உள்ளே நுழைந்தேன்.

சங்கரன் பஞ்ச கச்சம் கட்டி, நெற்றி முழுக்க திருநீர் பூசி அமர்க்களமாய் இருந்தான். பல சுற்றுக்கள் பெருத்தும் இருந்தான். குடுமி முன்பைவிட பெரிதாய் இருந்தது.

எத்தனைவாட்டி இவன் குடுமியை அவிழ்த்துவிட்டு கலாச்சியிருக்கோம்.... அவன் குடுமி மேல எனக்கு அப்படி ஒரு ஈர்ப்பு!

அதே மாதிரி அவன் கொண்டுவர்ர புளியோதரை ....சும்மா வாசனையே ஆளை தூக்கும் ... அதுல கிடக்குற வேர்கடலையை பொருக்கி சாப்பிடறதே தனி சுவை!

சங்கரன் ஆரத்தி தட்டுடன் கருவறையை விட்டு வெளிவந்தவன் எல்லோர் முன்பும் நீட்டுவது போலவே என் முன்பும் தட்டை நீட்டினான்.

"சங்கரா .."

"வாங்கோ ..சென்னைல இருந்து எப்போ வந்தேள்? ஆத்துல ....."

பார்மாலிட்டி கேள்விகளை அடுக்கியவன், கூட்டம் சேர அடுத்த ஆரத்திக்கு தயாரானான்.

அவன் முகத்தில் பால்யசிநேகிதனை பார்த்த மகிழ்ச்சியை காணவில்லை....இரண்டு வார்த்தையில் உன்னை எனக்கு தெரியும் என்பதாய் காட்டிவிட்டு, புரியாத மொழியில் கடவுளிடம் பேச போனவனை புரியாமல் பார்த்துக் கொண்டிருந்தேன்.

கருவறைக்குள் ஓடிபோய் குடுமியை அவிழ்த்துவிட்டு சேட்டை செய்ய பழைய நினைவு துரத்தினாலும், ஒரு வேளை இவர்கள் அவர்களாய் இல்லாமல் இருப்பார்களோ...? மெல்ல வெளியேறினேன்...!

சல சல வென ஓடிவரும் வாய்க்கால் கரையில் அமர்ந்தேன்.

இதே வாய்க்கால்ல என் சட்டைய சங்கரன், அனிபா, முனியன்னு எல்லோரும் ஆளுக்கு ஒரு மூலையா புடிச்சி ... அப்படியே அள்ளுனா...எங்க இருக்குற மீனும் நம்ம சட்டைக்கு ஓடிவந்துடும் ....
அதோ அந்த பாறைக்கு மறைவா சுட்டு சாப்பிட்டோமே ..... கட்டடிச்சிட்டு, ஒண்ணா மலையாள படம் பார்த்தது .....எல்லாத்தையும் இவங்களால மட்டும் எப்படி?...எங்கே தொலைந்து போனார்கள் .....?
ஊளை மூக்கை உறிஞ்சிக்கிட்டு சுத்தும் போது குருக்கள் மகனும் தெரியல ... வெட்டியான் மகனும் தெரியல ....வளர்ந்துட்டா மட்டும் எப்படி...? நம்மலோடவே சேர்ந்து அதுவும் வளர்ந்துடுதா ...? காலம் அவர்களை தொலைத்து விடுகிறதா....?

வாய்க்காலின் மறு கரையில், "ஆய் ...ஊய் ..." என்று சிரிப்பொலி கேட்க, சிந்தனை கலைந்து தலைநிமிர்ந்து பார்த்தேன்.

அதே போல், நான்கு, ஐந்து நண்பர்கள் கூட்டம். சத்துணவில் கொடுத்த சைசுக்கு ஒத்து வராத அந்த காக்கி டவுசரை ஒரு கையால் பிடித்தபடியே ஒரு அய்யர் பையனின் குடுமியை அவிழ்த்துவிட துரத்திக்கொண்டிருந்தனர்!
ஒருவனின் கையில், சட்டைத் துணியில் சில மீன்கள் துள்ளிக் கொண்டிருந்தது!

இதே மாதிரித்தான்...ரொம்ப நாள் கூட இல்ல ...இருபது வருஷம் தான்... அந்த நாட்கள் இனி தேடினாலும் கிடைக்கவா போகிறது ...? இப்படின்னு தெரிந்திருந்தால், வளராமலாவது இருந்திருக்கலாம் ....!

வளர, வளர ஜாதி, மதம், அந்தஸ்த்துன்னு விதவிதமா உடுப்பை போட்டுக்கிட்டு ...நம்மள தொலைச்சிட்டு ..... உண்மையான மனிதர்கள் நிச்சயமா வளர்ந்துட்டா கிடைக்க மாட்டார்கள்....

அவர்கள் வேறு யாரோ ... இவர்கள் வேறு யாரோ .... இங்கே முண்டங்கள் முகம் தின்று வாழ்கின்றன...!

மனம் நிறைய வேதனையோடு தலை குனிந்து நடந்துக் கொண்டிருந்தேன்...!

(முற்றும்)

சமுதாய பிச்சைக்காரர்கள் ...

2009-06-15T17:06:00.008+05:30

ஆகஸ்ட் 15 ……?

சுதந்திர தேவிக்கு
62 - வது வயது ...
இந்திய தொழிலாளர் சட்டப்படி
ஓய்வு பெற்று நான்கு வருடங்கள்
ஆகிவிட்டன ...

இன்றும் காத்திருக்கிறாள் ...

உலை வைக்க ரேசன் கடையில்,
நீண்ட வரிசையில் ...

தான் உயிருடன் இருப்பதை
நிருபித்து முதியோர் உதவி தொகை
பெற்றிட அரசு அலுவலக வாசலில் ...
கையில் கடன் வாங்கிய
நூறு ரூபாய் லஞ்ச பணத்துடன் ...

சமுதாய பிச்சைக்காரர்கள் ...

சுருக்கம் விழுந்த வயிற்றுக்காக
கை ஏந்தினான் கோவில்வாசலில்
-பிச்சைக்காரன் ...!

மதுவுக்கும், பிரியாணிக்காகவும்
வாகனங்களை ஓரம் கட்டினான்
போக்குவரத்து கே(கா)வலன் ….

தன் தலைமுறைக்கும்
சொத்து சேர்த்திட
ஓட்டுக்காக கை ஏந்தினான்
-அரசியல்வாதி ...

இங்கே
பிச்சைகள் ஒன்றுத்தான் ...
பெறும் முறைகள் தான்
வேறுபடுகின்றன ...!

ஏக்கம் ...!

அந்த படுபாவி ஆங்கிலயன்
மட்டும் பகலில் சுதந்திரம்
கொடுத்திருந்தால் ...
ஒரு வேளை தூக்கத்தில்
தொலைக்காமல் இருந்திருக்கலாம் ....

இயந்திர வாழ்க்கை ...

தினமோர் மறு
பிரசவம் ...
நெரிசல் பஸ்ஸில் ...!

என்றும் இல்லாமல் ...

அவள் என்னைப்பார்த்து
சிரித்த அன்று
கண்ணாடியில் தெரிந்தேன்
அழகாய் ....!

(நன்றி குமுதம் - 01/07/2009)

என் காதலி ...

அப்படியொன்றும் கவர்ச்சியாய்
இல்லை ...

மார்புகள் வற்றி ...
கண்களை சுற்றி கருவளையங்கள் ...
கன்னங்களில் சுருக்கங்கள் ...
ஆனாலும், பேரழகியாக தெரிகிறாள்....

அவரவர்களுக்கு
அவர்கள் தாய்...!

இரண்டாவது சுதந்திரம் .....

2009-06-08T17:10:00.007+05:30

இரண்டாவது சுதந்திரம் .....

பசியின் முகவரி
தெரியாமல் என்
புரட்சிக்கவிஞன்
பத்து பதினைந்து தென்னைகளுக்கு
மத்தியில் காதல் கவி புனையவேண்டும் ....

அன்பாய் பிறப்பெடுத்த
என் பொக்கைவாய் அகிம்ஷா
தாத்தா நடுவீட்டில்
சாய்வு நாற்காலியில் அமர்ந்து
அளாவளாவி குதுகளிக்க வேண்டும் ...

என் முதல் குடிமகன்
குண்டு துளைக்கா கூண்டை
உடைத்து,
தைரியமாய் வெளிவந்து
சுதந்திர கொடி ஏற்ற வேண்டும் ....

சிறைச்சாலைகள்
சிறுவர் பூங்காக்களாக
மலர வேண்டும் ...

வல்லரசு இந்தியாவின்
ஓர் குடையின் கீழ் இவ்வுலகம்
வரவேண்டும் ....
அதை ஓர் தமிழன் வழிநடத்த வேண்டும் ....

அங்கே மனிதநேயம்
தாய்ப்பாசத்துடன் மலரும்....!

இன்றைய கனவு
நாளைய வெளிச்சம் ...!

இங்கே,
பாரதிக்கும் ..
சுபாசுக்கும் ...
காந்திக்குமா பஞ்சம் ...?

எழுந்து வாருங்கள்
இரண்டாவது சுதந்திரம்
வெகு தூரமில்லை ....

நன்றி தினகதிர் வாரகதிர் - ஆகஸ்ட், 9, 2009

தவிர்க்க முடியாத உணர்வுகள் ...

2009-06-02T19:35:00.008+05:30

தவிர்க்க முடியாத உணர்வுகள் ...

காலை சுற்றிய பாம்பாய்
கடித்துக் கொண்டுயிருக்கிறது
உன் நினைவுகள் ...

அது ஒரு கனாக்காலம்...
மார்கழிமாத குளிராய்
நீ போட்ட கோலம் ...
அழியாமல் தாண்டிபோகும்
கன நேரம்
உன் நாணம் கண்டு
என் கால்கள் தடுமாறும் ...

இதயத்தின் பரிபாசையை
புரிந்துகொண்ட நாம்,
பொருளாதார உறவுகளை
புரிந்துக்கொள்ளாததால் ....
அர்த்த நாரியின் பிள்ளை கனவாய் .....

காலம் ஒரு விளையாட்டுப் பிள்ளை ....

உலகம் உருண்டை ...!

நாம் இருவரும்
மறுபடியும், மறுமுனையில்
சந்தித்து கொண்டோம் ...

நான் முதலாவதாய் மணந்திருந்த
உன் நினைவுகளும் ...
நீ முதலாவதாய் மணந்திருந்த
என் நினைவுகளும் ...
ஊமைகலாய் தாண்டிப்போனார்கள் ....

காலத்தின் ஓட்டங்கள்
உடல்களை பிரித்திருக்கலாம் ...

ஆனால்,
மறக்க முடியாது ...
அந்த முதல் முத்தத்தையும் ...!
முதல் பார்வையையும் ...!!

தவிர்க்க முடியாது ...
நிகழ்கால கணவன் மனைவிக்கு
நடுவே
முன்றாவது ஆளாய் "அது "
படுத்து கிடப்பதையும் ....

நன்றி தினமலர் வாரமலர் - 23/08/2009

ஓர் உணர்வின் உளறல் ....

2009-06-02T15:11:00.006+05:30

தாய்மை ...!

அரை நிர்வானமாய் அவள் ....
கையில் பசியோடு குழந்தை ...
சுற்றிலும் கண்கள் ....
- தோற்று போனான் காமன்...!

---------------------------------

மனசு ...

அமைதி தேடி போன இடத்தில்
அமைதி இன்றி தவிக்கிறது மனம்...
கோவில் நடை பதையில்
யாரோ தவறவிட்ட
ஒற்றை ரூபாய் .....!

----------------------------

குற்ற உணர்ச்சி....

பணத்திற்கு ஆசைப்பட்டு
ஆள்காட்டி விரலில்
கரும் புள்ளி வைத்தேன் ....
கறை படிந்து கிடக்கிறது மனசு ....!
---------------------------------

காதல் ...!

விழிமீன் தூண்டியலிட
இதயப்புழு
வழியப் போய்சிக்கி
கொள்கிறது ...!
-------------------------

விலைமகள் ...!

ஒரு ஜனுக்காக
எண் ஜானும் மரித்து போயி்ன ..!
கழுத்திற்கு கீழே கோடி கண்கள் ...!
கண்களுக்கு கீழே
துளிர்த்திருக்கும்
ஓர் துளியை யார் பார்ப்பார் ....?

முப்பத்து மூன்று சதவீதத்திற்கு ....

2009-06-01T19:42:00.006+05:30

முப்பத்து மூன்று சதவீதத்திற்கு ....

அன்றே கொடுத்திட்டன்
சிவன்
ஐம்பது சதவிதத்தை பெண்ணுக்கு...!
அரசியல்வாதியே...!
நீ யார் முப்பத்து மூன்று சதவீதத்திற்கு
நந்தியாய் .....
தரகனாய் ......
இடையில்,
விலகி நில் ...
நாளைய உலகம்
பால் வேறுபாடு அற்ற
சரிசமான
எங்கள் உலகம் ... !

வாழ்க்கை

2009-06-01T17:26:00.004+05:30

தூண்டியலில் புழு,
கரையில் ........
-பசியோடு மனிதன்.....
நீரில் பசியோடு மீன் ....
- வாழ்க்கை!

நீ சம்மதித்தால்....

2009-05-27T21:08:00.005+05:30

நன்றி தினகதிர் வாரகதிர் - மார்ச் , 1 , 2009

நாளைக்கு அஞ்சு வயசில ...

2009-05-25T22:44:00.004+05:30

நன்றி பாக்கியா - மே , 24 - 30/1996

காரணம் ....

2009-05-25T22:41:00.004+05:30

நன்றி - இதயம் பேசுகிறது - 11-06-2000

உணர்வுகள் ...

2009-05-21T15:41:00.004+05:30

நன்றி புரட்சி வேந்தன்

வேண்டாம் போலி வாழ்க்கை ....

2009-05-21T15:38:00.002+05:30

நன்றி தினமலர் வாரமலர் - ஜனவரி , 19, 1992

வேடிக்கை மனிதர்கள் ....

2009-05-21T15:33:00.005+05:30

நன்றி - ஓம் சக்தி - ஏப்ரல், 1997

நிமிர்ந்தால் வானம் ....

2009-05-21T15:30:00.004+05:30

நன்றி முகம்

முகவரி அற்ற மனிதர்கள் .....

2009-05-21T15:22:00.002+05:30

நன்றி தினமலர் வாரமலர் - அக்டோபர், 27 , 1991

(எனது முதல் படைப்பு ..)

மகத்துவம் ....

2009-05-21T15:18:00.002+05:30

நன்றி தினமலர் வாரமலர் - மே, 1 , 1994

கவலைகள் ....

2009-05-21T15:15:00.002+05:30

நன்றி எஜமான் - 23-12-1996

என் பத்து மாத ரத்தினமே .....

2009-05-21T15:06:00.002+05:30

நன்றி தினமலர் வாரமலர் - ஜனவரி 17, 1993

என் நடை பாதையில் .....

2009-05-21T15:00:00.002+05:30

நன்றி புரட்சிவேந்தன்

ஆன்மிகம் எங்கே ...?

2009-05-21T14:52:00.002+05:30

நன்றி புரட்சிவேந்தன்

என்னைப் பற்றி தினமலர் வாரமலரில் ....

2009-05-19T16:50:00.002+05:30